حوار فلسطيني بالامثال الفلسطينية

أبو فلسطين :ألي مكتوب على الجبين بشوفه العين يا اخوي

أبو سعود : دخلك يا أبو فلسطين اشو آخر الأخبار؟

أبو فلسطين: شو بتتوقع يعني.. "أتبدلت غزلانها بقرود".

أبو سعود: مفهمتك ؟



أبو فلسطين: يعني بصراحة أعطوهم الثقة وهم ما يستحقوها خاصة هذا اللي "أجا ونام عنا ليلة وساوى حاله من العيلة"!!

أبو سعود: مش هيك ألحكي يا أبو فلسطين والزلمة لسه "ما بنعرف خيره من شره".



أبو فلسطين: أي والله لو"حبسوه مع ابليس في كيس بطلع ابليس يستغيث" هذا "زي البرد سبب كل علة".



أبو سعود: لـه يا زلمة "الحيطان الها ودان" "احنا بنمشي الحيط الحيط وبنقول يارب السترة".



أبو فلسطين: ولليش الخوف؟ أي والله " الساكت عن الحق زي الناطق في الباطل". بعدين اشو اللي بدو يصير؟ "مابصير اكثر من اللي صار" ، والمثل بيقول "النعجة المذبوحة ما يوجعهاش السلخ"..

أبو سعود: يازلمة "مش كل اللي بنعرف بنقال".

أبو فلسطين: بصراحة يا أبو سعود "اللي بعمل حاله نخالة تنقه الجاج" واللي قاعد بصير ما بينسكت عليه..



أبو سعود: شوف يا أبو فلسطين الحكاية أكبر من صاحبك. هذي يا عمي أمريكا و"حدا بقدر يقول للغول عينك حمرا" ؟



أبو فلسطين: واشو يعني أمريكا مادام المسألة بتخص هالأرض .. لأنو يا أبو سعود "اللي بفرط بأرضه بفرط بعرضه" مش قالوا "الأرض عرض " ؟



أبو سعود: معلش لكن احنا "مش قدها" و"ليش نعمل حالنا أبو علي".

أبو فلسطين: يا حبيبي " التعوير في الوش.. مافيهوش معلش".

أبو سعود: والله اشو بدي اقول "طاسة وضايعة".



أبو فلسطين: أبداً الطاسة مش ضايعة و"خيرنا مابصير يروح لغيرنا" وهذا مش خيرنا وبس هذي أرضنا بتضيع ودمنا اللي بيسيل .



أبو سعود: لكن الصحيح احنا لازم نرضى باللي قاعدين
برتبوه النا حتى لو ضاع اشي من حقوقنا لأنه "نص العمى
ولا العمى كله" وزي ما بقول المثل :"بلا أهون من بلا
والكساح أهون من العمى ".



أبو فلسطين: شوف يا ابو سعود "لاتدير قفاك للدبابير وتقول منايا وتقادير".

أبو سعود: والله يابوفلسطين أنا معك لكن بعد اللي صار في العراق شكله "الدور علينا" و"الحبل على الجرار" والمثل بيقول "طيع لاتضيع" و"خليك على مقرودك ليجيك اقرد منه".

أبو فلسطين: والله إذا بدك تطاوع الأمريكان راح تنذل وتنهان والمثل برضه بقول " الحق الغراب بدلك على الخراب" و"هذي أمريكا وهذي بلاويها" .

أبو سعود: يا عمي "اللي ما إنت طوله لاتطاوله" و"هذا الحكي ما بجيب خبز" لكن أمريكا يمكن تجيب النا شوية خبز!

أبو فلسطين: والله "عشم ابليس في الجنة" ويا "طالب الدبس من ذيل النمس" و"إذا كنت نسيت بأذكرك" وعلى رايهم "إذا كنت نسيت اللي جرى هات الدفاتر تتقرا" وانت نفسك شفت شو عملوا في العراق و"اللي بياكل رغيف الظالم بحارب بسيفه" بتقبل تكون هيك يا بوفراس؟

أبو سعود: أنا ما بقول نتخلى عن حقنا لكن "بالتي هي أحسن".

أبو فلسطين: يا بوسعود إحنا اصحاب حق و"الطلب الهين بيضيع الحق البين" و"الحق اللي وراه مطالب مابيموتش".

أبو سعود: بس خلينا نجرب "لعل وعسى"، بعدين "زمان أول تحول" ويمكن انو أمريكا تغير من سياساتها لصالحنا هالمرة.

أبو فلسطين: والله يا ابو سعود "اللي أصله ........لازم ينبح" و"وين ما بقعد بنجس" و"اللي فيه طبع ما بغيره" وبصراحة انت باين الخوف قاتلك والخوف زي ما بقولوا "قطاع الركب".

أبو سعود: وانت لارضيت بمدريد ولا بأوسلو وإجا اللي أسخم منهم وهذي خريطة الطريق ومش عاجباك صراحة "انت مابعجبك العجب ولا الصيام في رجب".

أبو فلسطين: أنا والله بانصحك لكن الظاهر انو "اللي بينصحك زي اللي بيرصعك".

أبو سعود: على العموم " اللي بيجري على الناس بيجري علينا" والمثل بقول "حط راسك بين هالروس وقول يا قطاع الروس".

أبو فلسطين : كل اللي بدي أقوله "داوي جرحك مليح لابيدمي ولا بقيح" واحنا دوانا بها الجهاد المبارك والمقاومة بكل شارع وطريق مش بالجبن والخوف والجري ورا خرابيط الطريق !!